Fajardo gipaabot magbangis sa finals
CEBU, Philippines — Naila nga kalmado ang reigning MVP sa San Miguel Beermen nga si JuneMar Fajardo, apan lahi ang iyang pamahayag kabahin sa pagsugod sa ilang “best-of-seven” finals series batok sa Magnolia Hotshots alang sa PBA Philippine Cup title.
Ang Game 1 himuon karong gabii didto sa Smart Araneta Coliseum. Si Fajardo miingon nga mas bangis ang iyang ipakita ug buhaton niya ang tanan sa ilang finals series batok sa igsuon nilang koponan.
Gitug-an ni Fajardo nga naglungot-lungot siya ug gusto siya mobawos sa Magnolia nga mipahamtang kaniya og sakit nga kasinatian sa iyang rookie year niadtong tuig 2013 diin pakyas siya pagtilaw og kampiyonato dihang gipilde sila sa San Mig Coffee Mixers nga karon mao na ang Hotshots.
Ang 6-foot-10 nga Sugboanon seguradong maoy masentro sa depensa sa Magnolia, apan andam na kini ug salig siya nga tabangan siya sa iyang mga teammates sama nila ni Arwind Santos, Alex Cabagnot ug Marcio Lassiter.
Si Fajardo gisayangan nga dili niya ikaduwa iyang suod nga higala sa Gilas Pilipinas nga si Marc Pingris, apan nagpaabot kaniya ang lisud nga match-up batok ni Ian Sangalang ug laing Cebuano nga si Aldrech Ramos.
- Latest
