Pacquiao mibiya ni na Bob Arum

CEBU, Philippines — Giklaro na sa kampo ni Pinoy boxing icon Manny Pacquiao nga hingpit nang natapos ang kontrata sa kanhi eight-division world champion sa dugay na niyang boxing promoter Top Rank Inc. ni Bob Arum.

Mismo ang abogado ni Pacquiao nga si Eldibrando Viernesto ang miingon nga ang sangka ni Pacquiao batok ni Australian Jeff Horn sa miaging tuig mao ang katapusang away sa kontrata ni Pacquiao ubos sa Top Rank.

Gumikan niini, wala na’y katungod si Arum nga mobabag o bisan mohatag og komento sa gikataho nga WBA welterweight championship fight ni Pacquiao batok ni Lucas Matthysse sa Hunyo didto sa Kuala Lumpur.

“I reviewed the contract and I found out that Bob Arum has no more say even in the rematch, should there be any, between Manny Pacquiao and Australian boxer Jeff Horn,” matud pa ni Viernesto sa Philboxing.com.

Sa miaging semana, si Arum mihimakak nga wala na nila si Pacquiao ug miingon pa nga padayon pa sila nga nakignegosasyon alang sa sunod sangka ni Pacquiao karong tuiga.

“Pacquiao is under contract with Top Rank for reasonably long period of time but I don’t know when the contract will expire,” unang pamahayag ni Arum sa boxingscene.com.

Midugang pa ang kampo ni Pacquiao nga gusto ni Arum nga isabotahe ang duwa ni Pacquiao sa Hunyo tungod   sa interes niini nga pabiling makasapi gamit ang Pinoy superstar.

Si Pacquiao determinado na nga idayon ang sangka batok ni Matthysse ug salig kini nga dili makapugong si Arum. 

Ang Fighting senator nagsugod na og pasingot pangandam sa training alang sa maong sangka.

“Dela Hoya called up asking me if we could reset the Manila launching after the Holy Week. That’s why it (Manila press conference) was moved  to April 4,” matud pa ni Pacquiao.