Gisungay na sab
CEBU, Philippines - Gisungay na sab sa Chicago Bulls ang Boston Celtics, 111-97 aron pagposte og 2-0 nga bentaha sa ilang NBA playoff first-round series kagahapon didto sa TD Garden sa Boston, Massachusettes.
Ang Bulls nga munasginhawang miangkon og luna sa East playoff, nagtinguha karon nga mamahimong labing unang eight seed nga motagak sa No. 1 team sa unang hugna sukad gipakuratan sa Philadelphia 76ers ang Chicago niadtong tuig 2012.
Nahimong bida sa Bulls si Rajon Rondo nga sa usa ka bahin sa iyang karera nakadaog og titulo uban sa Celtics. Mitapos siya uban ang 11 puntos, 14 ka assists, siyam ka rebounds, lima ka steals ug tulo ka blocks.
“It’s key when you have a point guard like him that controls the whole game -- you've just got to play,” matud pa ni Dwyane Wade agi’g pagdayeg ni Rondo.
Sila si Wade ug Jimmy Butler parehong mitali og 22 puntos alang sa Bulls nga migamit og 10-0 run aron paglubong sa Celtics og 19 puntos sa katapusang kuwarter.
Si Celtics guard Isaiah Thomas nga padayong nagbangutan sa pagpanaw sa iyang manghod nga babaye nga si Chyna gumikan sa aksidente sa dalan, mihipos og 20 puntos, apan unom lamang sa 15 niya ka itsa ang iyang napasud.
Samtang ang Celtics wala gihapon makabawos sa Bulls, ang Toronto Raptors ug ang Los Angeles Clipper miresbak dayon batok sa ilang mga kaatbang.
Didto sa Toronto, si DeMar DeRozan mitali og 23 puntos, samtang si Kyle Lowry midugang og 22 sa dihang gibaslan sa Raptors ang Milwaukee Bucks, 106-100.
Nakatabla sab ang Clippers sa kaugalingon nilang serye batok sa Utah Jazz human miposte og 99-91 nga kadaugan sa Game-2 ubos sa pagpangu nilang Blake Griffin, Chris Paul ug DeAndre Jordan nga nagkumboya og 63 puntos. (BANAT NEWS)
- Latest
