Spurs balik sa ikaduha

CEBU, Philippines - Mibalik sa ikaduhang puwesto sa standing ang San  Antonio Spurs human sila mapilde sa Portland TrailBlazers, 110-106 sa ilang duwa sa NBA kagahapon didto sa AT&T Center sa San Antonio, Texas.

Si Damian Lillard mipabuhagay og 36 puntos  dihang gipakuratan sa Blazers ang Spurs.

Maayo untang balita ang nadawat sa Spurs human gitugotan sa mga doktor nga makaduwa na og balik si LaMarcus Aldridge nga dunay gamay nga problema sa iyang kasingkasing, apan wala sila makasugakod sa kainit sa Blazers.

Si C.J. McCollum midugang og 26 puntos sa Trail Blazers nga impresibong mibangon human gilubong og 23 puntos sa New Orleans Pelicans sa miagi nilang duwa.

Dunay 19 puntos ug pito ka rebounds si Aldridge, kinsa nakapalta og duha ka duwa kay dunay gimulo sa iyang kasingkasing. Apan human sa makuting eksaminasyon, nasuta nga dili seryoso ang iyang kondisyon hinungdan nga gipaduwa siya og balik sa iyang mga doktor.

Si Kawhi Leonard mipatuasik  og  34  puntos sa Spurs nga minaog sa ikaduhang puwesto  sunod sa Golden State Warriors bitbit ang 52-15 record.

Sa laing mga aksiyon, sila si Mike Conley ug Marc Gasol mikadlit og 27 puntos matag usa aron pangulohan ang Memphis Grizzlies pag-ihaw sa Chicago Bulls, 98-91, samtang wala panumbalinga ni Goran Dragic ang pagduwa bisan dunay black-eye ug nagkadugo ang iyang baba dayon na ngadto sa pagkulit og 33 puntos sa 120-112 nga kadaugan sa Miami Heat batok sa Pelicans.

Sa uban pang mga resulta, si Isaiah Thomas miposte og 27 puntos sa dihang gibuntog sa Boston Celtics ang Minnesota Timberwolves, 117-104, si Lou William mihipos og 30 puntos ug si James Harden mitali sa ika-17 niyang triple-double karon nga season sa dihang gimasaker sa Houston Rockets ang Los Angeles Lakers, 139-100, samtang sila si Giannis Antetokounmpo ug Khris Middleton mipupo og 16 puntos matag usa alang sa Milwaukee Bucks nga nakaipsot batok sa LA Clippers, 97-96.

Si Harden mitapos sa duwa uban ang 18 puntos, 13 ka assists ug 12 ka rebounds alang sa Rockets nga mipatilaw sa   Lakers sa ika-11 nga pilde sa katapusan niining 12 ka duwa. (BANAT NEWS)