Nasugamak

CEBU, Philippines - Miposa og 20 sa iyang 24 puntos si Andrew Wiggins sa second half, apil na niini ang duha ka free throws sa nahabiling 12.8 segundos sa duwa nga maoy nagselyado sa kulbahinam nga 103-102 nga daog sa Minnesota Timberwolves batok sa nagkagidlay nga Golden State Warriors sa NBA kagahapon didto sa Target Center sa Minneapolis, Minnesota.

Si  Ricky Rubio  midugang og 17 puntos ug 13 ka assists, samtang si Karl-Anthony Towns mitampo og 23 puntos alang sa ikaunom nga daog sa Wolves sa katapusang walo niini ka duwa nga maoy nagpahayag sa ilang tsansa nga makasud sa Western Conference playoffs.

Si Klay Thompson mipabuhagay og 30 puntos alang sa Golden State, apan mikagar na sab ang opensa ni Stephen Curry hinungdan nga nasugamak  na sab ang Warriors sa ikaduhang sunod-sunod nga higayon nga maoy ilang ikaupat sa unom ka duwa nga wala ang naangol nilang bitoon nga si Kevin Durant.

Mitali man tuod si Curry og 26 puntos, apan 10 lamang sa 27 niya ka itsa ang iyang napasud. Apil sa iyang sipyat mao ang iyang 18-footer sa himalatyong segundos nga posibleng makapadaog unta sa Warriors.

Sa laing aksiyon, si James Harden miratsada og 19 puntos, 13 ka assists ug pito ka rebounds sa dihang gipakugang sa Houston Rockets ang Chicago Bulls, 115-94. Miabag kaniya si Ryan Anderson nga dunay 21 puntos aron paglikay sa Rockets nga makatilaw sa labing una unta nilang tulo ka sagunson nga pilde karong season.

Si Dwyane Wade dunay 21 puntos sud sa 25 minutos, apan wala kini nahimo kay ang Bulls nahagba sa ikaupat nga sunod-sunod nga duwa.

Sa lain pang mga aksiyon, si Dennis Schroder mitali og 13 sa iyang 26 puntos aron pagtuboy sa Atlanta Hawks ngadto sa 105-99 nga kalampusan batok sa Toronto Raptors, sila si Giannis Antetokounmpo ug Khris Middleton pareho mitala og 21 puntos sa dihang gipukan sa Milwaukee Bucks ang Indiana Pacers, 99-85  alang sa ikalima nilang sunod-sunod nga daog, samtang si Kemba Walker dunay 23 puntos alang sa Charlotte Hornets nga mipilde sa Orlando Magic, 121-81. (BANAT NEWS)