UV kampiyon na sa CESAFI
CEBU, Philippines - Ang University of the Visayas (UV) Green Lancers naghangad sa nagbaga nilang opensiba sa naghinapos nga bahin sa ikatulong kuwarter dayon nakasustinir sa ilang kainit sa katapusang hugna aron pagtapos sa University of San Carlos (USC) Warriors, 65-53 sa Game-4 sa best-of-five 16th Cebu Schools Athletic Foundation, Inc. collegiate basketball finals kagabii didto sa Cebu Coliseum.
Ang Lancers mitapos sa serye sa baraha nga 3-1 aron pagsakmit sa una nilang korona sud sa tulo ka tuig ug ika-11 sa kinatibuk-an sukad niadtong tuig 2001.
“Ni-step up lang gyud ang mga bata ug ang ilang puso, gusto gyud sila nga ma-champion,” matud pa ni UV coach Gary Cortes.
Bisan og wala na makaduwa sa katapusang kuwarter gumikan kay naangol ang iyang tiil, si Rey Suerte mao gihapon ang nangu sa Lancers uban ang 14 puntos, samtang sila si Alfred Codilla ug Josue Segumpan mitampo og 11 puntos matag usa.
Gumikan sa maanindot niyang salida tibuok season, si Suerte maoy gikoronahang MVP. Giduyogan siya sa Mythical Five sa iyang teammate nga si Jan Monic Soliva, Jaybee Mantilla sa University of San Jose-Recoletos, Mark Jayven Tallo sa Southwestern University-Phinma ug Condrad Catapusan sa USC.
Labaw pa unta ang Warriors, 43-42, apan sila si Codilla, Jayson Balabag ug Sheldon Gahi milusad og 10-0 run nga maoy nakapaabante sa Lancers sa hingpit, 52-43. Human miinat sa ilang labaw ngadto sa 61-50, si Codilla mipasud og tulo sa upat niya ka free throws aron pagbuak sa dughan sa Warriors.
Tam-is nga panimalos ang gidalit sa Lancers ngadto sa Warriors nga maoy mipiog kanila sa makasaysayanon nilang best-of-five finals series sa miaging tuig. (BANAT NEWS)
- Latest
