SHS-Ateneo, UC magbugno na

CEBU, Philippines - Sugdan na sa three-time defending champions Sacred Heart School-Ateneo de Cebu (SHS-AdC) Magis Eagles ug University of Cebu (UC) Junior Webmasters ang dumot nilang finals rematch sa 16th Cebu Schools Athletic Foundation, Inc. men’s basketball tournament karong adlawa diha sa Cebu Coliseum.

Ang Game-1 sa ilang ‘best-of-three’ series gikatakda karong alas- 6:45 sa gabii, human sa tagakay nga duwa alang sa ikatulong dapit tali sa University of the Visayas (UV) Baby Lancers ug Cebu Eastern College (CEC) Dragons sa alas-5:15 sa hapon.

Ang Magis Eagles wa’y duda maoy labing gamhanan nga koponan sa juniors division. Puwera na lang sa UC, ilang lat-an og kapin sa 20 puntos ang ilang mga kontra.

Taliwala sa kabangis sa Magis Eagles, daw sa nahimo nilang patyanan ang Junior Webmasters nga mipilde kanila dili lamang kausa, apan duha na ka higayon karong season. Sa miaging tuig, ang UC sab maoy mipatilaw sa Ateneo sa bugtong niining pilde sa 15 ka duwa.

Sayod si SHS-Ateneo coach Rommel Rasmo nga dili basta-basta nga kontra ang UC nga hangtod karon nagpabiling tanghaga nga angayan nilang sulbaron.

“UC is always a tough match-up and obviously, it shows with our 0-2 record against them this year. They always play hard and tough. I have to give credit to their coaching staff and their players especially Umpad. He has improved his game a lot and has become an even tougher cover for us," matud pa ni Rasmo diin ang gipasabot niini ang idlas nga pointguard sa UC nga si Gelmart Umpad.

Gamitoy man tuod ang 4-foot-11 nga si Umpad, apan ang giilang “superboy” gikan sa Medellin, Cebu kun makaduwa mura’g usa ka higante.  Atol sa ilang duwa sa semis batok sa Ateneo niadtong Oktubre 8, si Umpad mikulit og career-high 30 puntos uban ang lima ka assists, tulo ka rebounds, duha ka steals ug usa ka block sa dihang ilang giusban og pilde ang Magis Eagles.

Bisan tuod og sila gihapon maoy inilog, si Rasmo nagdumili paghatag og prediksyon. Gipasalig hinuon niya nga buhaton kutob sa ilang mahimo aron pakgangon ang sagunson nilang pilde sa UC nga hangtod karon padayon nilang gihinuklogan.

Pangulohan nilang Jed Colonia, Eroll Pastor, Andrew Velasco, Travis Mantua ug Christian Manaytay, ang Magis Eagles makalaum sab nilang Koko Tuadles, Justin Javelosa, Patrick Yu, Andre Chua, Alex Visser, Michael Cutamora ug Ramon Lapiña.

Sa habig sa Junior Webmasters, si coach Joever ‘Brad’ Samonte mipadayag nga dili mahitabo nga isud nila sa ilang alimpatakan ang duha nila ka daog sa Magis Eagles  gumikan kay sayod siya nga lahi na ang plastada sa finals.

Gawas ni Umpad, si Samonte nanghinaut sab nga makabunlot og alas nilang John Bryl Cuyos, Luigi Gabisan, Jumike Casera, Kyle Ordeniza, Yannick Enriquez, Joseph Santome, Franco Inso, Jason Abejo ug Rovic Angco. (BANAT NEWS)