UC, DBTC laraw makigsawo sa liderato sa CESAFI

CEBU, Philippines - Ang University of Cebu  (UC) Junior Webmasters ug Don Bosco Technology Center (DBTC) Greywolves nagtinguha nga makaangkon og bahin sa liderato sa ilang pagbatok sa managlahing kontra sa 16th Cebu Schools Athletic Foundation, Inc. men’s basketball tournament karong adlawa diha sa Cebu Coliseum.

Makigtakus ang Junior Webmasters batok sa Cebu Institute of Technology-University (CIT-U) Wildkittens sa alas-4 sa hapon, samtang ang Greywolves makigtige sa Cebu Eastern College (CEC) Dragons sa ala-1 sa hapon.

Kasamtangan nga nagtabla bitbit ang 4-1 nga baraha, ang Junior Webmasters ug Greywolves parehong nagpanikad nga molansang og daog aron malinyada sila sa hataas nga bahin sa liderato uban sa three-time defending champions Sacred Heart School-Ateneo de Cebu Magis Eagles nga mao karon ang nag-una bitbit ang 5-1 nga marka.

Tali nilang duha, ang Greywolves mao ang dunay presyur nga mohimo og impresiyon gumikan kay nakatilaw sila sa una nilang pilde sa makauulaw nga paagi sa mga kamot sa Magis Eagles, 48-73 sa miagi nilang duwa usa ka semana ang milabay.

Gawas pa niini, dili sab mayano-yano sa Greywolves ang Dragons  nga nakakolekta na sab og tulo ka daog nga giatbangan sa susamang gidaghanon sa pilde.

Sa laing duwa sa juniors division nga gikatakda sa alas-2:30 sa hapon, ang Southwestern University-Phinma Baby Cobras naglaraw nga inaton ang ilang 2-4 rekord sa dihang ilang sangkaon ang 1-4 nga University of San Carlos Baby Warriors.

Sa laing bahin, matapos na karon ang unang hugna sa eliminasyon sa collegiate division diin ang University of San Jose-Recoletos Jaguars nagtinguha nga mokulit sa ikaupat nilang daog sa unom ka duwa sa ilang pakighamag sa 1-4 nga University of Southern Philippines Foundation Panthers sa alas-5:30. (BANAT PALARO)