CEBU, Philippines - Sukdon na sab ang katakus sa GlobalPort Batang Pier human sa ilang kadaugan batok sa Rain or Shine Elasto Painters dihang sangkaon nila ang Alaska Aces sa PBA Philippine Cup karong adlawa didto sa Smart Araneta Coliseum.
Ang Batang Pier ug Aces nga pulos adunay 3-1 win-loss records magsangka sa alas-4:15 sa hapon.
Ang kadaugan sa GlobalPort o Alaska motukmod kanila sa unang dapit sa standing uban sa Rain or Shine.
Human sa iyang game-winner batok sa Painters, si Stanley Pringle mao na sab ang gilauman ni coach Pido Jarencio nga mohimo og laing dalaygong performance sa duwa nila batok sa Alaska.
Lain pang mobida sa GlobalPort mao sila si Terrence Romeo, Jay Washington, Keith Jensen ug Joseph Yeo. Atbangan nila ang mga alas sa Alaska nga sila si Calvin Abueva, Cyrus Baguio, JV Casio ug Tony Dela Cruz.
Sa main game nga gikatakda sa alas-7 sa gabii, ang Talk ‘N Text Tropang Texters gusto usab nga makigsawo sa labaw sa standing sa ilang pakigtakus sa NLEX Road Warriors. (BANAT PALARO)