Duty free-SM, Mactan kampiyon sa 4th Duty Free Sportsfest

CEBU, Philippines – Gidominar sa Duty Free-Mactan ang kinatibuk-ang duwa atol sa finals batok sa Duty Free-Lahug, 42-34 aron sakmiton ang championship trophy sa 14th season sa  Duty Free Sportsfest  basketball tournament niadtong Huwebes sa gabii didto sa Kimwa gym sa Barangay Subangdaku, Mandaue City.

Ang kadaugan gipangulohan ni Yo Nueneran, kinsa mikanlat og 13 puntos.

Kanunay naglabaw ang Duty Free-Mactan ug sila sab ang nagdominar sa rebounding department hinungdan nga nagkapuliki ug nagkagidlay ang Duty Free-Lahug  sa  maong duwa.

Ang Duty Free-Mactan maoy midiktar sa duwa gikan sa pagsugod ug wala na kini molingi human moposte og 15 puntos nga labaw sa halftime, 22-7.

Bisan  gilubong, nikayod lang gihapon ang Duty Free-Lahug aron hatagan og lisud nga duwa ang Duty Free-Mactan kansang kapaspas maoy ilang  puhonan.

Miaksiyon unta og gukod ang Duty Free-Lahug pinaagi sa paningkamot nilang Carl Tajo ug Jhong Nayon dihang nilubad ang depensa sa Duty Free-Mactan, 34-40 sa hinapos nga bahin sa fourth quarter, apan wala  sila mosalir  kay ulahi na kaayo ang ilang mga diskarte. Abtik sab kaayo ang Duty Free-Mactan  nga nakatubag sa ilang opensa aron mabingat pagbalik ang labaw.

Sa laing bahin, ang    Duty Free-SM  spikers mipukan sa Duty Free-Mactan sud sa duha ka sets, 15-8, 15-8 aron sakmiton ang   women’s volleyball title.

Mibida sa kadaugan sa  Duty Free-SM mao silang Jessica Labis, Jonha Villa ug Joey Suqit nga mipakita sa ilang tinagoang abilidad.

Ang Duty Free-SM  wala sab makasinati og kalisud sa ilang pagsud sa finals dihang yano ra sab kaayo miiskor og daog batok sa Duty Free-Lahug sud gihapon sa duha ka sets, 15-12, 15-2.

Ang Duty Free Sportsfest 2015 giorganisar nilang Ogie Cenabre  ug  Gani Tajo.

Puntos Matag Usa

MACTAN (42) – Nueneran 13, Arnibal 8, Bregente 7, Monterde 6, Oral 2, Arapan 2, Oroyan 1.

LAHUG (34) – C. Tajo 8, Delos Reyes 6, Nayon 6, Ebardo 5, Morante 4, Tito 3, G. Tajo 2. (BANAT NEWS)