Ateneo, EAC pupuwesto sa quarterfinals

MANILA, Philippines - Iuusad  ng NCAA champion Emilio Aguinaldo College Generals at UAAP titlist Ateneo Eagles ang isang paa patungong quarterfinals sa pagharap sa magkahiwalay na laro sa Spikers’ Turf Collegiate Conference ngayon sa The Arena sa San Juan City.

Masasabing mas madali ang larong haharapin ng Generals dahil katipan nila ang wala pang panalong Mapua Cardinals sa unang laro sa ganap na ala-1 ng hapon.

Tinalo ng EAC ang mga koponan ng UE Warriors at FEU Tamaraws para saluhan ang National University Bulldogs sa liderato sa Group A sa 2-0 baraha.

Tiyak na lalabas ang buong puwersa ng Generals  upang ipatikim sa Cardinals ang  kanilang ikatlong sunod na pagkatalo.

Ang Eagles ay masusukat dahil katipan nila ang UP Maroons sa huling laro dakong alas-5 ng hapon.

Labanan para sa lide­rato ang magaganap dahil parehong wala pang talo ang  Ateneo at UP matapos ang dalawang laro sa Group B sa ligang inorganisa ng Sports Vision at handog ng PLDT Home Ultera.

Ang ikalawang laro dakong alas-3 ng hapon ay sa pagitan ng FEU at UE at ang magwawagi ay papasok sa win-column sa Group A.