CIC mopasiugda’g swimming tournament

CEBU, Philippines - Ang Cebu International School mopahigayon og  invitational swimming competition sa Marso 14 diha sa ilang school campus  sa barangay Talamban, ning dakbayan.

Ang  torneyo bukas sa tanang swimmers sa boys ug girls division. Adunay mga age-brackets nga tigian nga naglakip sa 8-years old and under, 9-10, 11-12, 13-14, 15-16, 17-18, 19-21 ug 21 years-old and above.

Languyon sa mga partisepante ang 25-meter competition pool sa CIS nga adunay unom ka lanes. Wala hinuoy limit sa gidaghanon sa mga swimmers nga gusto moapil sa maong kalihukan.

Sa mga interesadong mosalmot, ang registration fee nagkantidad og P100 sa tanang kategoriya.  Mahimong magpalista sa adlaw na mismo sa lumba didto sa CIS.