HDP printing hari sa inter-company
CEBU, Philippines - Gipuga nila ni Juliver Pelayo, Jundee Dano ug Jomar Lepiten ang tanan nilang abilidad aron tabangan ang HDP Printing/Turtle Transport pagpatik og dakung kadaugan.
Ang HDP Printing ni coach Peter Pelayo mipilde sa Cebu Home Builders, 101-96 aron masakmit ang Inter-Company division title sa 4th Palarong Pambarangay sa miaging semana diha sa Telof open court sa barangay Subangdaku, Mandaue City.
Si Pelayo mitusak og 29 puntos, lakip na ang unom ka triples, gisundan ni Dano sa iyang 25 puntos, samtang si Lepiten misansan og 22 puntos alang HDP Printer nilang team manager Alfie Trinidad ug Oliver Andales.
Miamot sab si Ervin Saladaga og 14 puntos aron tabangan ang HDP Printing, kansang teamwork ug determinasyon maoy naghaw-as kanila gikan sa sikit kaayo nga duwa gikan sa pagsugod hangtod nahuman.
Abante og uno punto ang Cebu Home Builders sa first period, 21-20, apan dali kining napapas human sa “back-to-back” triples ni Pelayo aron hatagan ang HDP Printing og tres puntos nga bentaha, 34-31 sa second period.
Nakatabla ang Cebu Home Builders, 95-all sa three-pointer ni Victor Bacalso sa nahabiling 1:02 sa duwa, apan didto ra kutob ang maayo nilang salida kay gipakgang ang ilang mainitong opensa sa HDP Printing pinaagi sa trapping defense.
Si Pablo Cabrera maoy nangu sa Cebu Home Builders nga mipabuhagay og 37 puntos, si Bacalso midukdok og 22 puntos, samtang si Pablo Baguio milansang og 14 puntos.
Ang mga duwa gidumala nilang Dodod Colina, Richie Tecson ug Ashley James Cortes isip committee, uban nilang Eric Plazo, Marlon Tutoy, Benjamin Jamili ug Christopher Maloloy-on.
Ang liga nga gipadagan sa ilang chairman Rene Tecson gisuportahan sa Subangdaku Barangay Council ubos sa liderato ni Brgy. Capt. Ernie Manatad.
PUNTOS MATAG USA
HDP Printing (101) – Pelayo 29, Dano 25, Lepiten 22, Saladaga 14, Lucero 3, Danes 2, Selecio 2, Caparoso 2.
Cebu Home Builders (96) – Cabrera 37, Bacalso 22, Baguio 14, Villar 8, Genson 6, Balderos 6, Martillan 2. (BANAT PALARO)
- Latest
