LABA Lancers pilde sa Larobis
CEBU, Philippines – Gipahugtan pa sa MCC-Larobis ang ilang kampanya alang sa kampiyonato pinaagi sa pag-iskor og daog batok sa LABA Lancers, 121-107 sa nagkainit nga aksyon sa Los Amigos Basketball Association (LABA) Commissioner’s Cup diha sa Banilad Sports Center, Mandaue City.
Sila si Lloyd Chavez ug Asis parehong mipabuhagay og 22 puntos aron hatagan og laing kadaugan ang Larobis nga milabaw lang og uno punto, 44-43 sa nahabiling dos minutos sa dili pa ang halftime. Apan human sa break, kalit nga miburot ang iskor sa Larobis ni team owner Bax Larobis ngadto sa 68-47 dihang giregalohan sila’g 16 puntos human ang upat ka players sa Lancers ni team owner Chris Ubas wala motunga.
Tungod niini, ang leading scorer sa Larobis nga si Canjo Echavez wala kaayo pasudla.
Sa ilang bahin, si konsehal Gilbert Sebandal ug Chris Ubas nga adunay dakung katungdanan sa LABA nagkumboya’g 49 puntos alang sa Lancers nga nanamilit na sa liga. Si Sebandal mipupo og 25 puntos, samtang si Ubas miani’g 24 puntos. Si Florentino Ecot miabuno’g 18 puntos.
Nangahas paggukod ang LABA Lancers, apan ulahi na kaayo ang paningkamot nilang Sebandal, Ubas ug Ecot kay nahutdan sila sa oras. Ang three-point shot ni Sebandal dayong kahurot sa oras maoy katapusang puntos sa Lancers niining maong liga nga gipaluyohan ni Brgy. Capt. Greg B. Yap ug iyang mga konsehales. Si Sebandal, ang LABA vice president for external maoy nidumala sa mga duwa. (BANAT NEWS)
- Latest
