Bagong estratehiya ilalatag ni Altamirano vs FEU sa Game 3
MANILA, Philippines - Sa susunod na Miyerkules pa muling magkikita ang Bulldogs at ang Tamaraws para sa ‘winner-take-all’ Game Three ng 77th UAAP men’s basketball championship.
Ayon kay National University head coach Eric Altamirano, gagamitin nila ang nasabing ‘break’ para paghandaang mabuti ang kanilang gagawing estratehiya laban sa FEU ni mentor Nash Racela.
“We will just use these couple of days wisely, manage the players and prepare well for Game Three,” sabi ni Altamirano matapos ang 62-47 pagdomina ng Bulldogs sa Tamaraws sa Game Two noong nakaraang Miyerkules para itabla sa 1-1 ang kanilang best-of-three championship series.
Nauna nang kinuha ng FEU, hangad ang kanilang pang-20 UAAP crown, ang 75-70 panalo sa Game One.
Sa nasabing kabiguan ay inamin ni Altamirano na masyadong nagdiwang ang NU matapos talunin ng dalawang beses ang five-peat champions na Ateneo sa Final Four.
“I guess partly it has something to do with that ‘yong parang may euphoria pa nu’ng pagkapanalo namin sa Ateneo. And actually, that was a Wednesday so only had two days to prepare,” ani Altamirano.
Sa panalo ng Bulldogs sa Game Two ay humakot si forward Jeth Troy Rosario ng 19 points at 13 rebounds, habang nagdagdag si Glenn Khobuntin ng 17 markers kasunod ang 12 ni Angelo Alolino.
Tumapos naman si Mac Belo na may 15 points kasunod ang 15 ni guard Mike Tolomia sa panig ng Tamaraws na umiskor lamang ng 6 markers sa kabuuan ng first half.
- Latest
