USJ-R, CEC, SHS-AdC milansang duha ka daog

CEBU, Philippines -  Tulo ka koponan ang milansang sa ilang duha ka sunod-sunod nga daog sa Alaska Basketball Cup Cebu 2014 (ABCC) niadtong weekend didto sa Lux Oriens gym sa Sacred Heart School-Ateneo de Cebu (SHS-AdC) gym sa Brgy. Canduman, dakbayan sa Mandaue.

 Ang University of San Jose-Recoletos (USJ-R) midaog sa Don Bosco Technology Center (DBTC), 28-26 ug midaog sab og dos puntos batok sa SHS-AdC, 18-16 aron moposte og sunod-sunod nga daog sa Under-10 age group. Miiskor sab og duha ka sunod-sunod nga daog ang Cebu Eastern College (CEC) sa Division 1 Under-13 pinaagi sa paglubong sa DBTC, 56-40 ug sa pagpilde sa SHS-AdC, 61-59. Ang SHS-AdC walay kukaluoy nga nimasaker sa DBTC-1, 79-24 ug ingon man sa San Isidro Parish School, 59-48 sa overtime aron mokulit sa ilang ikaduhang sunod-sunod nga daog sa Division 1 Under 16 age group.

 Sa laing duwa sa 10-Under, ang University of San Carlos (USC) Green midemolis sa St. Benedict Child Education Centre, 41-16, samtang gilubong sab sa CEC ang DBTC, 24-13.

 Sa Division I Under 13, ang University of the Visayas (UV) nakarekober sa ilang pilde sa opening day dihang ilang gipahimungtan ang SHS-AdC, 40-38 ug ang DBTC-A, 40-31. Ang SHS-AdC-B mipilde sa Asian Learning Center (ACL), 43-37, samtang ang Colegio de la Imaculada Concepcion-Mandaue (CIC-M) nimasaker sa DBTC-B, 54-25 sa Division 2 Under 13.

 Sa laing aksiyon, ang defending Under 16 champion UV-A midaog batok sa USJR-A, 56-48. Ang Thumbs Up I mipilde sa University of Cebu (UC) , 50-46, samtang ang Salazar Colleges of Science and Institute of Technology (SCSIT)  naka-eskapo batok sa CIC-M B97, 50-49 ug ang CEC-A mipukan sa SCSIT, 62-55.

 Ang ABCC 2014 hinugpong proyekto sa Alaska Milk ug sa Cebu Youth Basketball League nga karon anaa na sa ikapitong tuig isip binyu sa grassroots and developmental basketball alang sa age groups 16 ug paubos. (BANAT NEWS)