Angel Mary Pawnshop 2-0 na

CEBU, Philippines - Nagmangtas ang Angel Mary Pawnshop diin mipauwan og daghang puntos ang ilang mga pambato aron maka-eskapo batok sa mas paborito nga Simple Likes Barbecue Haus, 114-111 kaniadtong Miyerkules sa nagpadayon nga 7th season sa F. Llamas Youth Association nga giilang 2013 FYA-Phillip Zafra Cup didto sa barangay Tisa gym, ning dakbayan.

Sa sayo pa, midaug ang Pimentel Brokers sa ilang debut batok sa Harold's Hotel, 125-111.

May higayon pa untang modaug ang Simple Likes sa nahibiling pipila ka segundos, 111-112 human sa split charities ni Lito Mirasol ug dihang nakuha ni Victor Lastomen, misipyat sab siya sa iyang tirada ug human makuha ni Jaz Sydiongco ang rebound, napugos sila'g foul nga maoy hinungdan nakaipsot ang Angel Mary kinsa mao karo'y nag-una sa team standings sa ilang 2-0 nga baraha.

Suwayan karon sa Angel Mary nga mokulit sa ilang ikatulong sagunson nga daog dihang ilang ikasangka ang Harold's Hotel samtang magsangka sab karong gabii ang D&L Sportswear batok sa BD Law Firm.

Si McLean Alkuino maoy nangu sa Angel Mary sa iyang 20 puntos samtang sila si Reniel Lim, Jayson Ramirez ug Sydiongco, pulos mibahug og double figures.

Silang Ruel Baguio ug Lito Bermudez mihimo sab og double figures alang sa Angel Mary Pawnshop. 

Si Noel Medalle maoy nangu sa 1-1 nga Simpe Likes sa iyang 26 puntos ug laing upat ka teammates ang mibahug sab og double figures.

Sa sayo pa, mipataruy og pito ka three-pointers si Nico Laborte aron pangulohan ang Pimentel Brokers sa iyang 32 puntos.

Si Dandan Enriquez maoy nangu sa Harold's Hotel sa iyang 36 puntos og si Bryan Antiporta mihimo sab og pito ka triples aron mo-iskor og 22 puntos alang sa Harold's Hotel apan wala makaduwa si Beking Rollon tungod kay lubong sa iyang amahan nga mitaliwan na ngadto sa laing kalibotan.

Puntos matag usa:

First Game:

Pimentel Brokers (125)—   Laborte 32, Abellana 16, Patalita 14, Reyes 12, Caballero 11, Bahina 9, Aglipa 9, Malicay 8, Boysello 8, Duran 4.

Harold's Hotel (111)— Enriquez 36, Antiporta 22, Masongsong 19, Cal 17, Lavandero 11, Nudalo 4, Trinidad 2.

Second Game:

Angel Mary Pawnhop (114)— Alkuino 20, Lim 17, Ramirez 15, Sydiongco 14, Baguio 12, Bermudez 11,   Dumaguit 8, Pardenilla 8, Rara 5, Jabonero 2, Parba 2.

Simple Likes (111)—  Medalle 26, Dacayana 14, Canceko 13, Zapanta 10, Lastomen 10, Regudo 8, Baricuatro 8, Sabalande 6, Abella. (FREEMAN)