Orcollo-Corteza duo may tiket na sa Last 4
MANILA, Philippines - Hindi iniwan ng ma-gandang break sina Dennis Orcollo at Lee Van Corteza upang umabante sa 888.com World Cup of Pool semifinals sa one-sided na 9-1 panalo kina Miko Balasz at Gabor Solymosi ng Hungary na nilalaro sa York Hall sa Bethnal Green, London, England.
Ito ang ikalawang sunod na taon na magkatambal sina Corteza at Orcollo at handa na nilang ibaon sa limot ang first round na pagkatalo noong 2012.
Makakalaban nila ang pambato ng Chinese Taipei na sina Chang Jung Lin at Ko Pin Yi para sa puwesto sa Finals.
Sinorpresa nina Chang at Ko ang isa sa panlaban ng England na sina Darren Appleton at Karl Boyes sa 9-3 iskor.
Walang suwerte ang host country dahil kahit ang kanilang England B na binuo nina Chris Melling at Daryl Peach ay namaalam na rin sa kamay ng nagdedepensang kampeon na Finland na binuo nina Mika Immonen at Petri Makkonen, sa 4-9 iskor.
Kalaban nina Immonen at Makkonen sa isang semis match sina Niels Feijen at Nick Van den Berg ng Netherlands na pinagpahinga sina Naoyuki Oi at Lo Li Wen ng Japan sa dikitang 9-8 panalo.
- Latest
