BIR mipilde sa DOST sa ARENA tilt
CEBU, Philippines - Napilde sa Bureau of Internal Revenue (BIR) ni Regional Director Atty. Hermino Palamine ang Department of Science and Technology (DOST) sa iskor nga 65-61 elimination round sa Association of Regional Executives in National Agencies (ARENA-7) basketball tournament niadtong Martes didto sa DPWH covered court sa SRP, ning dakbayan.
Nagkupot na karon og 4-3 nga kadaugan ang BIR human sa kadaugan.
Sayong namuntos ang BIR pinaagi sa tandem nilang Yoly Meso ug Leo Galvez, apan daling nakarekober ang DOST pinaagi sa pagpabuhagay og 24-13 run nga gipasiugdahan nilang Boy Raboya ug Dodong Dinglasa.
Ang BIR ni coach Norwin Honoridez mipatuman og hugot nga depensa sa third quarter aron makapugos og turnovers ang DOST. Gani nakahimo'g daghang steals silang Clint Del Rosario ug Galvez ug ilang na-outscore ang DOST, 15-6 run aron moposte og tres puntos nga bentaha, 47-44 paingon sa final quarter.
Nahimong sikit ang kinatibuk-ang fourth period diin nagbanos-banos og labaw ang duha ka kampo hangtod nga nakahigayon silang Allen Sorela ug Meso pag-iskor sa ilang krusyal nga mga puntos sa daginutong oras.
Si Galvez maoy nangu sa BIR sa iyang 15 puntos, samtang sila si Sorela ug Meso nagkumboya og 21 puntos.
Ang pilderong DOST gipangulohan nilang Raboya ug Dinglasa nga adunay 15 ug 13 puntos matag usa.
PUNTOS MATAG USA
BIR (65) - Galvez 15, Sorela 11, Meso 10, Del Rosario 8, Billiones 8, Diamos 4, Bonsucan 4, California 2, Cavan 2, Ruiz 1
DOST (61) - Raboya 15,
Dinglasa 13, Elvie 9, Rectaso 7, Larrobis 6, Rodriguez 4, Jenfronx 2, Pedralba 2, Bustillo 1 (BANAT SPORTS)
- Latest
