Tabunok third sa Talisay Mayor's Cup 2012

CEBU, Philippines - Gilat-an sa Tabunok squad ang Lawaan I, 81-62 aron sakmiton ang third place trophy sa seniors division sa Talisay City Mayor's Cup 2012 basketball tournament sa miaging gabii didto sa Talisay City Sports Complex.

Gikan sa siyete puntos nga labaw sa opening period, 18-11, ang Tabunok milusad og 20-6 rally nga maoy mihatag kanila og 13 puntos nga labaw, 40-27 sa halftime. Sukad niadto wala na molingi pa ang Tabunok sa naghangos nga Lawaan 1 hangtod nahurot ang oras.

Sila si Paulo Georsua, Joavan Puebla ug Roy Quianchon parehong miiskor og 14 puntos aron pangulohan ang Tabunok, samtang si James Gavelan maoy leading scorer sa Lawaan 1 sa iyang 28 puntos.

Ang Tabunok mao usab ang miangkon sa third place trophy sa open division human nila gibuntog ang Bulacao sa iskor nga 87-75.

Sa SK division, ang Pooc mipukan sa San Isidro, 79-69 aron mopahiluna sa ikatulo nga dapit.  (BANAT SPORTS)

Show comments