CEBU, Philippines - Wa makauyon si kanhi Philippine Olympic Committee (POC) president Cristy Ramos sa pag-absuwelto sa disciplinary committee sa Philippine Football Federation (PFF) sa duha ka sakop sa Philippine Azkals kabahin sa reklamo niyang ‘sexual harassment’.
Si Ramos misang-at og reklamo nga ‘sexual harassment’ ngadto nila ni Azkals players Fil-Spanish Angel Guirado ug Fil-Chinese Lexton Moy, human siya giingong gibastos sa duha ka players atol sa usa ka exhibition game niadtong Pebrero.
Apan sa desisyon nga gipakanaog sa PFF disciplinary committee, sila si Guirado ug Moy gi-absuwelto sa maong reklamo, hinuon gipahamtangan gihapon kini og silot nga suspension tungod sa wala nila pagtahud ni Ramos.
“This decision says only one thing: they don’t care about the behavior and character of the players,” matud pa ni Ramos. “I’m truly disappointed and disgusted on the decision.”
Wala pa hinuon gitino ni Ramos kun aduna ba siyay plano nga moapelar sa unang desisyon sa PFF aron hingpit gyud nga masilotan ang duha ka sakop sa Azkals.