The Grand Gathering 2012 sugdan na
CEBU, Philippines - Sugdan na karong adlawa ang labing dakung kalihukan sa Cacoy Doce Pares World Eskrima Federation karong tuiga -- ang World Eskrima Seminar and World Tournament diha sa City Sports Club-Cebu (CSCC) sa Cebu Business Park.
Adunay 60 ka langyaw ug 40 ka Pinoy eskrimadors ang mosalmot sa maong kalihukan nga matapos karong Hunyo 10.
Ang labing dakung grupo sa eskrimadors naggikan sa Australia. Lain pang mga nasud nga mosalmot naglakip sa Canada, United States ug Mexico.
Tulo ka grupo sa Australians ang mosalmot -- usa kanila gipangulohan ni Grand Master Vince Palumbo, ang usa gipangulohan ni GM Chris Nasilowski ug ang lain pang usa gikan sa Sydney gipangulohan ni Master Craig Bajraktarevic-Hayward, ang tag-iya sa The Combat Zone Eskrima Club.
Si Hayward ubanan nilang Jun Anthony, Jerome Balangue, Alex Sua ug Deo Avila.
"The more participants you have, the more chances of winning," matud pa ni Hayward.
Karong buntag, himuon ang registration sa dili pa sugdan ang martial arts seminar workshop, samtang inig alas-3:30 sa hapon himuon ang weigh-in sa tanang partisipante.
May pagahimuon sab nga "promotion" sa mga sakop sa Doce Pares ug ingon man ang pag-instalar nila ngadto sa Hall of Fame karong Biyernes sa gabii didto sa Grand Convention Center sa Archbishop Reyes Avenue, ning siyudad. (BANAT NEWS)
- Latest
- Trending
