12 ka canadians maoy mga early birds

CEBU, Philippines - Labing menos 12 ka mga Canadian nationals maoy unang nangabot dinhe sa Sugbo gikan sa Montreal, Canada nga maoy mga early birds alang sa dakung kalihokan sa eskrima karong Hunyo 6-10 nga mao ang 6th Cacoy Doce Pares World Federation international martial arts seminar ug eskrima championshipnga gitawag ug "The Grand Gathering 2012" didto sa City Sports Club sa Cebu Business Park sa Ayala.

Unom kanila ang na-atlan sa BANAT Sports nga nagpahigayon og warm-up ug nag-ensayo didto sa Cacoy Doce Pares headquarters sa dan C. Padilla, ning dakbayan sa miaging adlaw.

Sila mao ang Filipino-Canadian Master nga si Chris Bautista, Joao Silva, Panagiotis Tseveris, Jean Edward Pierre Toussant, Anthony Pantazopolous ug ang bugtong babaye sa maong grupo nga si Cheryl Laforteza. Ang mga ngalan sa ubang Canadians nga gikan sa Toronto wala pa malista hangtod ning pagsuwat tungod kay didto sila sa Cebu City Sports Center sa Abellana nagpahigayon og jogging.

Dul-an sa 100 ka eskrimadors ang mosalmot sa maong seminar ug torneyo nga maglakip sa 40 ka estudyanteng eskrimadors gikan sa University of Cebu nga gipangulohan ni Max Caballes samtang 20 kanila nga mga Australians ang gikatakdang moabot karong adlawa.

Ang mga Australians pangulohan nilang Grandmasters Vince Palumbo ug Chris Nasilowski kinsa parehong nanag-iya og mga martial arts schools disto sa ilang nasud.

Si Panagiotis kinsa unang higayon pa lang nga nakatunob sa Pilipinas nagkanayon nga tuyo niyang mosayo og abot sa Sugbo aron maka-adjust siya sa mga batasan sa Sugboanon, sa atong kultura ug sa ating pagkaon nga makahatag kaniya'g bentaha kung itandi sa ubang first-timers. Matod pa sa mga Canadians, ilang gisagop ang sistema sa Cacoy Doce Pares sa ilang pagsangyaw sa eskrima didto sa ilang lugar.

Si Supreme Grand Master Ciriano "Cacoy" Cañete nagkanayon nga aduna sa'y mga eskrimadors nga gikan sa Cagayan de Oro, Borbon ug San Fernando nga andam nang mosalida atol sa maong torneyo.

Matod pa niya nga himoon ang registration sa Hunyo 6 sa alas 8 sa buntag didto sa benyu. Adunay himoon nga welcome banquet didto sa Golden Prince Hotel and Suites sa mao gihapong adlaw sa alas 7:30 sa gabii.

Ang Hall of Fame enshrinement ug protion sa mga miyembro pagahimoon didto sa Grand Convention Center sa Hunyo 8 sa alas 7:30 sa gabii ug ang despedida o farewell party adto pagahimoon sa panimalay ni Cañete unya sa Hunyo 10. Domingo sa alas 7:30 gihapon sa gabii.

Ang anak babaye ni Cañete nga si Catherine C. Knight nga usa sab ka eskrima master, mi-abot gikan sa New Jersey aron mosaksi sa "The Grand Gathering" apan dili siya mosalmot sa torneyo. Wala mokuyog karong tuiga sa ilang biyahe ang iyang bana nga si Jim Knight kinsa usa ka telecom engineer. (BANAT NEWS)