CEBU, Philippines - Gipukan sa Green Team ni skipper Jingjing Rama ang White Team sa iskor, 79-63 aron sakmiton ang solong liderato sa nagpadayong 3rd Major Alfonso Abbariao Cup - Biggest Loser basketball tournament 2012 didto sa Basak San Nicolas gym, ning dakbayan.
Ang Green kinsa naghupot na karon og 7-2 nga baraha, nagmangtas didto sa fourth period diin miposte sila'g 13 puntos nga abante, 55-42 ug wala na makaapas ang White sa pagbuylo sa Green.
Mibahug og 32 puntos si Rama nga naglakip og pito ka three-pointers ug gi-abagan siya nilang Noel Medalle ug Inting Bacalla kinsa midugang og 15 ug 12 puntos matag usa.
Ang White sa laing bahin, gipangulohan nilang Boodie Monteño ug Andrew Yu sa ilang 17 ug 11 puntos matag usa.
Mao kadto'y ikatulong pilde nga nahiagoman sa White hinungdan nga midailos sila ngadto sa ikaduhang pwesto pinaagi sa ilang 6-3 nga baraha.
Sa sayo pa, midaug ang Blue Team ni District Collector Ronnie Silvestre dihang mi-iskor sila'g upset batok sa Red, 65-53 apan mao lang kadto'y ilang ikaduhang daog sulod sa siyam ka duwa.
Silang Tata Laborte ug Collector Silvestre maoy nangu sa opensa sa Blue sa ilang 20 ug 12 puntos matag usa samtang ang 3-6 nga Red Team gipangulohan ni Jojo Quiño kinsa miposa og 11 puntos ug miamot og 10 puntos matag usa silang Nido Apuya, Bong Mabalo ug Jan Mose apan wala makaduwa silang Mactan Collector Bingo Matugas ug kanhi UC Webmasters skipper Kenneth Kern Sesante.
Puntos matag usa:
First Game:
GREEN (79)- Rama 32, Medalle 15, Bacalla 12, Cabrera 8, Javellana 8, Rabanes 4, Datu 2.
WHITE (63)- Monteño 17, Yu 11, Paghasi-an 10, Cañete 10, Sabanal 9, Viodor 4, De Gracia 2.
Second Game:
BLUE (65)- Laborte 20, Silvestre 12, Gornez 8, Capalan 6, Laraga 6, Manahan 6, Camunayan 5, Vandame 2.
RED (53)- Quiño 11, Mabalo 10, Apuya 10, Mose 10, Cabahug 7, Bailio 4. - BANAT NEWS