CEBU, Philippines - Wala gihapo'y kaseguroan nga mobalik na ug duwa si Kobe Bryant karong adlawa atol sa ilang pag-host batok sa Dallas Mavericks didto sa Staples Center sa Los Angeles, California.
Hayan kini mao ikalimang sunodsunod nga higayon nga dili makaduwa si Bryant, ang NBA scoring leader.
Matod pa ni Lakers coach Mike Brown nga ilang papahuwayon si Bryant aron hingpit nga maayo ang nagaras niyang bukog ubos sa tuhod.
Adunay 3-1 nga baraha ang Lakers sukad wala moduwa si Bryant ug ang labing bag-o nilang biktima mao ang Denver Nuggets kinsa ilang gipukan sa iksor, 103-97.
Maayo ra hinoong molakaw sa Bryant nga wala mogamit og protection sa iyang paa apan wala pa siya mosuway og dagan o paglukso.
Aduna na lay nahibiling unom ka duwa ang Lakers sa dili pa magsugod ang playoffs.
Mibalik si Brown didto sa Lakers atol sa ilang praktis kagahapon. Wala siya mo-coach niadtong Biyernes tungod kay duna siya'y giatiman nga "personal matter" nga wala niya ibutyag. - (BANAT NEWS)