CEBU, Philippines - Magsinukdanay na sab sa ilang abilidad ang mga dekalibreng beach volleyball players sa Sugbu sa pagsugod sa Takas sa Talisay All-Women Beach Volley Invitational karong adlawa didto sa Liberation Park sa Brgy. Poblacion, Talisay City.
Sila si Danika Yolanda Gendrauli ug Anna Bennova Sabanal sa Southwestern University (SWU) lakip sa mga early title favorites sa maong torneyo.Si Gendrauli, uban sa katimbang niyang si Lorie Mae Layno, lab-as pa gikan sa first-runner-up finish sa Visayas leg sa 15th Nestea Beach Volley duha na ka semana ang milabay didto sa HK Beach Resort sa Moalboal.
Sila si Gendrauli ug Sabanal gipaabot nga makasugat og lig-ong kontra gikan nilang Apple Eve Saraum ug Rochelle Rica sa University of Southern Philippines Foundation (USPF), Chona Gesulga ug Suzette Panis sa University of San Carlos (USC) ug Ma. Abegail Praca ug Regin Obinque sa University of San Jose-Recoletos (USJ-R).
Mopakita sab og aksiyon ang tandems nilang Jusabelle Brillo ug Marielle Froilan ug Katherine Jumapao ug Marissa Lagancia.
Gawas sa mga medalya ug tropeyo, ang kampiyon mobulsa og P7,000, samtang ang second hangtod sa fourth placers makadawat og P5,000, P3,000 ug P2,000.
Ang non-winners makadawat og consolation prize nga P1,000. (BANAT SPORTS)