CEBU, Philippines - Duha ka sporting events ang gilusad sa Junior Chamber International (JCI) nga tipik sa ilang fund-raising program karong Marso 10-11 sa managlahing binyu.
Ang JCI mopahigayon og usa ka football tournament nga uloha'g "Kick Off! Soccer Tournament" ug "Run to Lead Benefit Run."
Ang football event adto ipahigayon sa San Roque Football field sa Mandaue City, samtang ang lumba manukad sa Plaza Independencia.
Ang lumba adunay tulo ka kategoriya, 12k, 6k ug 3k fun run.
Gilaumang kapin sa 1,500 runners ang mosalmot sa lumba diin ang top three finishers sa matag kategoriya makadawat og ganting salapi ug medalya.
Aduna kini registration fee P300, samtang P250 sa mga estudyante. Ang senior citizens makadiskuwento og 20 porsiyento.
Mahimong magparehistro didto sa Runnr sa Ayala Active Zone ug Body Fitness Club sa Talisay. (BANAT SPORTS)