CEBU, Philippines - Nangatol ang mga kamot ni Jeff Viernes diin miduslit kini og 17 sa iyang team-high 33 puntos aron pangulohan ang Southwestern University (SWU) Cobras ngadto sa 91-86 nga kadaugan batok sa defending champion Salazar Colleges of Science and Institute of Technology (SCSIT) Skyblazers sa katapusang adlaw sa eliminasyon sa 2nd Cebu Basketball Association-M. Lhuillier Kwarta Padala Mayor’s Cup didto sa Cebu Coliseum.
Si Viernes mipasulod og lima sa iyang unom ka triples alang sa Cobras, kinsa nagbaton og 17 puntos, 53-36 sa halftime.
Misuway pag-apas ang Skyblazers sa giya ni ex-PBA Dale Singson ug wingman Mark Abadia, apan igo lang nilang napahakan ang labaw sa 10 puntos, 70-80 sa nahabiling singko minutos sa duwa.
Ang Cobras ni coach Raul 'Yayoy' Alcoseba, subling milusad sa ilang mainitong rally sa pagpangulo ni Eleazar Armecin ug Jessmar Villahermosa aron inaton ang labaw ngadto sa 15 puntos, 90-75, sa katapusang 2:39 sa duwa.
Gawas kang Viernes, laing duha ka Cobras nga mihimo og double digits mao sila si Armecin ug Villahermosa nga mirehistro og 13 ug 12 puntos matag usa.
Si Abadia maoy leading scorer sa SCSIT sa iyang 27 puntos, samtang sila si Singson ug Elvis Labares nagkumboya og 29 puntos. (BANAT SPORTS)