CEBU, Philippines - Napanglatawan ni ALA Promotions president Michael Aldeguer nga krusyal ang sunod sangka ni ALA Gym fighter Rey 'Boom Boom' Bautista batok ni undefeated Mexican power puncher Angel Mendoza.
Ang Bautista-Mendoza fight maoy main event sa "Pinoy Pride X" karong Disyembre 10 didto sa Hoops Dome sa Lapu-Lapu City.
Matud ni Aldeguer kini tungod kay nagdepende sa resulta sa away ni Bautista kun makuha ba niini ang gipaabot nga world title shot batok ni IBF featherweight king Billy Dib sa Australia.
Ang Bol-anong si Bautista (31-2, 23KOs), mosuway pagsakmit sa bakanteng IBF International championship batok ni Mendoza (17-0) ug tanan daog gikan sa knockout.
"This was mentioned before but we’ll study options after this fight," matud pa ni Aldeguer. "Bautista knows this is a crucial fight and has been training hard for what is expected to be an action-packed battle of knockout artists."
Una nang gituki sa ALA Promotions ang ilang plano nga isangka si Bautista batok ni Dib, apan misamot ang atensiyon sa maong posibilidad dihang midaog si Dib sa iyang title defense niadtong Domingo. Si Dib (33-1, 20KOs) mipatumba sud lang sa unang round sa iyang challenger ug world No. 8 nga si Alberto Servidei. (BANAT SPORTS)