CEBU, Philippines - Milampos ang University of Cebu (UC) Webmasters sa ilang tinguha pagdaog og 'back-to-back" title pinaagi sa pagpilde sa Southwestern University (SWU) Cobras, 60-54 sa Game-5 sa 11th Cebu Schools Athletic Foundation Inc. (CESAFI) basketball event kagabii didto sa Cebu Coliseum.
Gipangulohan ni 6-foot-9 center Junemar Fajardo ang kadaugan pinaagi sa iyang 23 puntos.
Si Edward Pao igo lang og sayes puntos gikan sa three point area, apan igo na kaayo kini aron tabangan ang Webmasters pagkulit sa ilang sunod-sunod nga korona.
Si Pao, kinsa wala gyud maka-iskor kapin sa tulo ka kuwarter ug gisagpa og unsportsmanlike foul batok ni Eleazar Armecin, kinsa iyang napatumba dihang iyang gisiko ang suwang niini sa katapusang 4:30 sa final period.
Misuporta sab si Quinton Brian Heruela, kinsa miamot og 11 puntos.
Ang pilderong Cobras gipangulohan ni Rene Pacquiao sa iyang 18 puntos. (BANAT NEWS)