CEBU, Philippines - Karon pa gani nga adlawa ang pormal nga pagsugod sa aksiyon, misanting na sa huna-huna sa two-time champion Team Visayas ang pagkab-ot sa talagsaon ug makasaysayanon nga "grandslam" title sa MILO National Finals karong Nobiyembre didto sa Lingayen, Pangasinan.
Atol sa engrandeng opening ceremony kagahapon sa 16th MILO Little Olympic-Visayas diha sa Cebu City Sports Center, dul-an sa 8,000 ka atleta gikan sa nagkalain-laing tunghaan ug unibersidad sa Kabisay-an ang miparada uban ang paglaum nga malakip sa "Team Bisdaks."
Si MILO-Visayas tournament organizer Ricky Ballesteros namayahag, nga sa pagdaghan sa mga atletang misalmot, mas modaghan sab ang ilang hagpaton aron ilakip sa Team Visayas.
Sa iyang bahin, si MILO Sports Executive Pat Goc-ong miingon nga bisan pa'g giisip silang inilog alang sa National finals, dili sila angay mokompiyansa tungod kay gidungog nga puwerte sab ang pagpangandam sa ilang karibal nga National Capital Region (NCR).
"NCR is also trying to take their first overall trophy," matud pa ni Goc-ong. "We should not think that we are the champions because there will be no more room for improvement, we should always strive for the best to win the prestigious perpetual trophy."
Ning tuiga, 124 ka tunghaan sa elementary ug 118 sa secondary levels ang magbangga sa 13 ka sporting events ning duha ka weekends nga kompetisyon.
Ang sporting events nga tigian sa mga batan-ong atleta maglakip sa athletics, badminton, chess, football, gymnastics, lawn tennis, scrabble, sepak takraw, swimming, table tennis, taekwondo ug volleyball.
Usa sa mga highlights sa opening ceremony kagahapon mao ang tradisyonal nga "lighting of the urn of peace and unity" nga gipangulohan sa labing batang sakop sa RP Team sa sepak takraw ug 2010 Most Outstanding Athlete nga si Rhey Jey Ortouste.
Mikawat usab og atensiyon ang indigay sa kaanyag diin sila si Jonabil Juliano sa Mambaling Elementary School ug Gazini Christiana Jordi Gonddos sa Thrice Admirable Montessori-Talisay maoy napiling "Miss Milo Little Olympics 2011" sa elementary ug secondary divisions. (BANATSPORTS)