Manila, Philippines - Magpapatuloy ang Enersel Forte Philippine National Motocross Series at World Motocross Series sa Lanao Del Norte mula Hunyo 25 hanggang 27.
Mangunguna sa hanay ng mga pambato ng bansa ay si Glenn Aguilar na magbabalak na mapag-ibayo ang tinamong ikalawang puwestong pagtatapos sa huling yugto na isinagawa sa Iloilo.
Si Tyson Lacey ang siyang hinirang na kampeon sa huling edisyon at mangunguna ang nasabing rider sa hanay ng mga dayuhan na kasali sa tatlong araw na karera.
Ang iba pang dayuhan mula sa American Motocross Association (AMA) ay sina Jake Locks, Dennis Stapleton, Daniel Blair, Kyle Matthew Lewis, Jesse Robert Jolson at Andrew John Morgan.
Una nang nakapagdaos ng motocross sa Lanao Del Norte noong nakaraang Disyembre at ang pagbabalik sa nasabing probinsya ay naisakatuparan dahil na rin sa suporta ni Governor Mohamad Khalid Dimaporo.
“Pangarap ni Governor Dimaporo na gawin ang Lanao Del Norte bilang motocross capital ng Pilipinas at tiniyak niyang matutuwa ang mga lalahok sa gagawing paghahanda at pag-estima ng mga locals,” wika ni Sel-J President at CEO Jay Lacnit.
Ang butihing Gobernador nga ay sasali rin sa karera tulad ni Lacnit.
Makakaagapay naman ni Aguilar sa hanay ng mga pambatong riders ng bansa ay sina Jolet Jao, Jovie Saulog at Donark Yuson.