CBM hawod sa 2011 G-League Swimfest

CEBU, Philippines - Miposte og 1,069 puntos ang Cebu Blue Marlins (CBM) aron masakmit ang overall title sa 1st leg sa 2011 G-League Regional Long Course Swimming Championships diha sa Cebu City Sports Center niadtong weekend.

Gawas sa overall champions, kadaghanan sa mga pambato sa CBM nidaog sab isip most outstanding athletes sa ilang tagsa-tagsa ka dibisyon.

Si Anthony Linn Navaro, usa sa representante sa PHL alang sa 2011 SEA Age-group Swimming Championships didto sa Vietnam niining umaabot nga Hulyo, mikabkab og pito ka bulawan ug maoy labing maayo sa iyang kategoriya sa boys 13.

Mipakita sab sa iyang katakus si Michael Ichiro Kong diin mihakot kini og lima ka bulawan ug maoy labing hawod sa boys 12, samtang si Jobert Indaya mihipos og tulo ka bulawan nga igo na kaayo alang kaniya aron manghawod sa boys 9.

Si Rocin Jakobsen naghari sa boys 14 division uban ang duha ka golds ug duha sab ka silvers nga nakapahimo kaniya isip labing maayo sa boys 18-above category.

Lain pang gipasidunggan isip most outstanding swimmers mao sila si Karen Mae Indaya sa iyang lima ka golds ug duha ka silvers (girls 11), Lyh Ann Navarro nga adunay unom ka golds ug usa ka silver (girls 12), Razel Cabajar uban ang upat ka golds (girls 13) ug Romilyn Niña Ignacio sa iyang tulo ka golds ug usa ka silver (girls 16-under).

Laing swimmers sa CBM nga nakatabang og daku ngadto sa Cebu team mao sila si Paula Abigail Vega (2 golds, 3 silvers, 1 bronze), Christine Indaya, Joshua Rosada ug JE Rose Rosada nga adunay tag-usa ka bulawan. Tara Kyla Ebon (1-1-1), Annita Munterola (1-2-1), Danielle Mae Ballesteros (1-gold, 2 bronzes), Trina Cañeda (1-2-1) ug Beth Mae Arellano (1-gold, 3 silvers).

Sa kinatibuk-an, ang CBM ni head coach Rolando Alvarez mihakot og 49 golds, 43 silvers ug 34 bronzes. (BANAT NEWS)