Frizberry subha'g daog sa GAA cagefest

CEBU, Philippines - Gipukan sa Frizberry Yogurt ang Evan Aulga Hardware, 102-93 alang sa ilang unang daog sa pagsugod sa 2011 Guadalupe Athletic Association (GAA) Founder's Cup didto sa Guadalupe Sports Complex niadtong Domingo.

Sayong nakontrolar sa Frizberry ang duwa pinaagi sa ilang fastbreak plays sa pagpangulo ni Bars Miñoza diin niposte kini og 12 puntos nga labaw sa first half, 42-30.

Apan sa second half, ang Evan Aulga sa pagpangulo nilang Jun Ragasajo ug Lawas mihimo og kaugalingon nilang rally aron pahakan ang labaw ngadto na lang sa dos puntos, 69-71 sa nahabiling 8:58 sa final period. Pakyas hinuon sila pag-ilog sa labaw kay ang Frizberry ubos sa liderato ni ex-SWU Cobras Rey Potot mipauwan og mga puntos aron moposte og double digits nga labaw, 89-73 sa katapusang kuwatro minutos sa duwa.

Si Potot maoy nangu sa Frizberry pinaagi sa iyang 25 puntos.

Sa laing bahin, gawas sa tropeyo, ang makampiyon mobulsa og P6,000 nga ganti ning usa ka bulan nga torneyo nga ubos sa ilang presidente Raul Aulga Sollano.

 PUNTOS MATAG USA

Frizberry (102) - Potot 25, Miñoza 22, Cabisag 18, Dimampo 16, Gabutan 9, Pajuay 9, Teofiz 8, Jacaban 6, Mangyao 3

Evan Aulga (83) - Gabutan 16, Gabonada 14, Lawas 12, Biscocho 10, Cabanilla 8, Ragasajo 8, Dela Rosa 6, Mabatid 6, Pedrosa 4, P. Sollano 4, R. Sollano 4   - BANAT NEWS