CEBU, Philippines - Himuon na ang ikaduhang hugna sa boxing reality series sa GMA-7 Network nga "Buhay Boksingero” karong hapon didto sa Carcar Sports Complex, dakbayan sa Carcar.
Siyam ka paresan sa mga sumusulbong nga boksidor ang magsinukliay'g kumo sa tagsa-tagsa nila ka mga four rounder bouts.
Sa main event, panalipdan ni Leonard Nicanor (1-0) ang iyang limpiyong baraha batok ni Rodel Wenceslao (0-1).
Moaway sa labing unang higayon si Joel Soterol batok ni Anecito Dondon Gesta. Si Memar Dula (1-1-1, 1 KO) moharong ni Khino Bandala sa Leyte, si Erwin Yamo (1-5-1, 1 KO) makigsinukmagay ni Bernard Salicinas, si Jherpaul Valero mohamag ni Jerome Baja (1-2) ug ang walay pildeng si Renoel Pael laraw sab nga mokulit og daog batok ni Reymond Fermin.
Mokompleto sa fight card mao ang sangka nila ni Jessie Dignos batok Arnold Meraltes, RJ Gonzales batok Jobert Alvarez, ug Gilbert Magos batok ni JR Salvador. (BANATSPORTS)