CEBU, Philippines - Miabot na ang panahon alang ni Dodie Boy Peñalosa Jr. aron ipakita kun andam na ba kini sa iyang misyon nga mosunod sa lakang sa iyang mga kaliwat sa dihang iyang sangkaon si Roel Bacquiano sa "Dugong Kampiyon" boxing card karong gabii diha sa Cebu City Sports Institute.
Anak ni kanhi two-division world champion Dodie Boy Peñalosa Sr. ug pag-umangkon ni former WBO bantamweight titlist Gerry Peñalosa, ang batan-ong Peñalosa mosuway og hipos sa ikaupat niyang sunod-sunod nga daog.
Atol sa weigh-in kagahapon didto sa Cebu City Sports Complex, si Peñalosa Jr. mitimbang og 122 lbs., samtang ang pambato sa Mimi Ricarte stable nga si Bacquiano mitimbang nga 120 lbs.
Sa undercard sa Ren-Wil Promotions ug Cebu City Sports Commission boxing card, si Anthony Sabalde sa SSG stable makigbatok ni Romnick Magos sa RWS Gym ug Sherwin Caday sa Sanai Stable batok ni Rommel Banquirigo sa RWS stable. - BANAT NEWS