2010 MS Motosuit Motocross Series top riders pasidunggan karon

CEBU, Philippines - Pasidunggan na ang mga riders nga nakalabok og maayo sa miaging tuig sa ipahigayong MS Motosuit Motocross Series karong gabii diha sa Teatro Casino sa Waterfront-Cebu City Hotel and Casino.

Mangu sa mga awardees mao sila si Jon-Jon Adlawan, Donkey Sanchez ug Cyril Tariman nga   milangkat og tag-duha ka overall championships.

Si Adlawan nihari sa pro open uban iyang 171 puntos, gisundan ni Jubenile Abellar sa iyang 156 puntos ug John  Flores nga adunay 146 puntos.

Naghari sab si Adlawan sa expert division nga mihipos og 185 puntos. Si Flores (171) ug Rex Barbaso (135) maoy mi-okupar sa ikaduha ug ikatulo nga dapit.

Sa laing bahin, si Sanchez mao sab ang nipatigbabaw human mihipos og 260 puntos batok nilang JC Obligado (170) ug Dong Batiquin (77) sa local enduro. Iya usab nga gidominar ang open enduro dihang miposte kini'g 314 puntos. 

Samtang si Tariman naghari sa beginners open production bitbit ang 195 puntos ug sa novice open production nga adunay 175 puntos.

Nagpabiling hari si Siegfred Ornopia sa executive A uban ang 240 puntos, si Jun Enriquez maoy nanghawod sa executive B nga mihipos og 231 puntos, samtang si Jerry Sicad mao sab ang hawod sa executive C nga adunay 130 puntos. (BANATSPORTS)