CEBU, Philippines - Nahagit na usab ang mga local runners human sa kompirmasyon nga makig-ilog kanila alang sa titulo ang mga Kenyan runners nga midagsa dinhi aron mosalmot sa 21K run sa "Smile to the Finish Line" karong Domingo didto sa Asiatown IT Park sa Brgy. Apas.
Si race director Kenneth Casquejo, mikompirmar nga pipila ka mga Kenyan runners ang nakaparehistro na lakip na niini ang mga kampiyon sa miaging SM2SM half-marathon nga sila si Benjamin Kipkazi ug Susan Jemutai.
"Wala untay mga Kenyans ba pero kung naa man gani gyud, wala na tay mahimo. Maningkamot lang gyud mi ani," matud ni Mary Joy Tabal.
Si Tabal uban ang mga beterana nga sila si Mary Grace Delos Santos ug Madelyn Carter mao ang top local bets sa lumba, apan mag-atubang sila og hugot nga kompetisyon batok ni Jemutai nga usa na ka tang-ang international marathoner. Mosalmot usab sa lumba ang mga sikat nga artista sama nila ni Richard Gutierrez ug Cesar Montano ug ang iyang kapikas nga si Sunshine Cruz.
Liboan usab ka mga beterano ug fun runners ang managan sa 10K, 5K ug 3K class. Apan ang labing gipaabot mao ang pagdagan nilang Cebu Governor Gwendolyn Garcia ug Cebu City Mayor Michael Rama. (BANATSPORTS)