CEBU, Philippines - Magtakus na ang topseeds Lite Shipping ug ang Cebu Movers System (CMS) sa Game-1 sa "best-of-three" finals sa Lucio “Guy” Lim, Sr. Memorial Cup basketball tournament diha sa City Sports Club-Cebu gym sa Cebu Business Park.
Ang Lite Shipping ni coach Elmer 'Boy' Cabahug nga miharos sa elimination round sa ilang 5-0 nga baraha nisud sa finals human gipalagpot ang FAL Shipping sa semifinals aron pagbaton og twice-to-beat advantage.
Si Lite Shipping team owner Nino Imboy nagkanayon nga dili gihapon sila mokompiyansa sa CMS ni coach Dr. Boy Te bisan pa og ila na kining napilde sa elimination.
Matud pa ni Imboy nga ang pagbalik karon ni ex-UV Lancer Dante Elim daku kaayo’g ikatabang sa ilang kampanya sa korona. Wala makaduwa si Elim sa semifinals tungod kay mipauli siya sa Oroquieta City kay namatay ang iyang inahan. Si Elim maoy mosuporta sa leading scorer nga si Allan Cabral ug back-up ngadto kang Daks Iway alang sa depensa uban nilang Eming Batarilan ug Jeffrey Sinoy.
Sa iyang bahin, si Te mosalig sa iyang mga batos nga naglakip sa iyang anak nga si Franco, ang top gunner nga si Vincent Reyes ug ingon man nilang Juanito Sasing ug Joselito Ocampo.
Ang FAL Shipping ug ang Aisle Marine Services maoy mag-ilog alang sa ikatulong puwesto. (BANATSPORTS)