Navarro mikabkab na sab og bulawan sa G-League swimfest

CEBU, Philippines - Namingwit og laing duha ka bulawan ug usa ka silver si Anthony Linn Navarro sa Cebu Blue Marlins (CBM) atol sa penultinate day sa National G-League Age Group Swimming Championship niadtong Domingo didto sa Trace Aqua Sports Center sa Los Baños, Laguna.

Ang tinun-an sa Cebu Eastern College (CEC) nga si Navarro mipupo og bulawan sa 200m individual medley ug sa 50m backstroke sa 12-under category. Mihakot sab siya og silver sa 400m individual medley.

Si Navarro, ang outstanding swimmer sa miaging tuig, nakatigom na og duha ka bulawan niadtong Sabado pinaagi sa 200m backstroke ug 100m individual medley.

Sa laing bahin, si Michael Ichiro Kong sa FBC Christian School, wala kalahutay sa iyang pagpamupo og bulawan kay miani lang kini og

silver sa 200m individual medley sa 12-year old class.

Ang igsuon ni Anthony Linn nga si Lyh Ann Navarro mikabkab lang og silver sa 400m individual medley sa 11-year old category. (BANATSPORTS)