FAL Shipping, Aisle Marine abante sa semis sa Lucio Lim Sr. caging

CEBU, Philippines - Miabante ngadto sa semifinals ang FAL Shipping ug ang Aisle Marine Services human nila palayasa ang tagsa-tagsa nilang kaatbang sa Lucio 'Guy' Lim, Sr. Memorial basketball tournament didto sa City Sports Club-Cebu gym sa Cebu Business Park.

Ang Aisle Marine sa pagpangulo ni Mark Manigque nakaipsot batok sa Megapaint, 73-71, samtang ang FAL Shipping nakaipsot sa Sunline Machine Shop sa iskor nga 70-54.

Ang Aisle Marine ug FAL Shipping nakig-uban sa walay pildeng Lite Shipping (5-0) ni team owner Niño Imboy ug Cebu Movers System (4-1) ni playing coach Dr. Boy Te. Ang Lite Shipping ug CMS parehong nakabaton og twice-to-beat advantage sa semifinal round.

Si Charlie Baguio maoy mitimon sa opensa sa Aisle Marine pinaagi sa iyang 22 puntos, samtang sila si Barry Ledesma ug Rhunald Sencil parehong miamot og 20 puntos. Ang Megapaint (1-4), gipangulohan sab ni Arnel Momo, kinsa mibahog og 27 puntos, gisundan nilang Efren Tajanlangit ug Ricky Pantilag nga adunay 17 ug 16 puntos matag usa.

Sa laing duwa, si Derekson dela Cerna miburak og 34 puntos lakip na ang lima ka triples aron pangulohan ang FAL Shipping samtang si Tumulak miamot og 10 puntos.

Ang Sunline nga wala gyud makatilaw bisa'g usa lang ka daog sa lima ka duwa, gipangulohan ni Elmer dela Peña, kinsa mihakot og 19 puntos, samtang si Jessie Baring midugang og 16 puntos.

PUNTOS MATAG USA

Unang duwa:

Aisle Marine (73) - Baguio 22, Ledesma 20, Sencil 20, Econas 8. Manigque 6, Ogue 4, Gimena 4, Trinidad 1

Megapaint (71) - Momo 27, Tajanlangit 17, Pantilag 16, Dayon 7, Arreglado 6, Ermac 4

Ikaduhang duwa:

FAL Shipping (70) - Dela Cerna 34, Tumulak 10, Molina 8, Rizalde 6, Borja 6, Tubli 6, Romagos 6, Guangco 4

Sunline (54) - Dela Peña 19, Baring 16, Canoog 9, Guinan 6, Peri 4 (BANAT)