Baguio, Tan hari sa HGS Indoor Triathlon

CEBU, Philippines - Nanghawod sila si Franz Baguio ug Rochelle Tan sa tagsa-tagsa nila ka dibisyon sa tinuig nga Indoor Triathlon sa Holiday Gym and Spa diha sa Brgy. Banilad, ning siyudad.

Ang notadong triathlete sa Sugbu nga si Baguio mitapos sa 300-meter, 10-minute stationary bike ug 3-kilometer run sud sa oras nga 29:21 aron pag-angkon sa titulo sa men's senior's 20 division.

Si Jaype Campaña mitapos sa lumba sud sa 31 minutos aron sa pagpahiluna sa ikaduha, gisundan ni Jack Danie Ombid sa oras nga 31:05.

Sa pikas bahin, si Tan, ang kampiyon sa miaging Xterra Philippines Marathon mao ang miangkon sa korona sa female open division nga mi-oras og 33:26, samtang si Loveleinell Casidsid (34:06) maoy mipahiluna sa ikaduha ug ang kanhi top local bet nga si Ripples Rafanan-Faelnar (35:37) maoy ikatulo.

Sa juniors division, si Gavin Solijon, kinsa mi-oras og 30:35, mao ang naghari, gisundan nila ni Kristian Paul Garciano (34:54) ug Rafael Tan (37:39) alang sa ikaduha ug ikatulong dapit.

Si Tyrone Tan (31:34) maoy midaog sa master’s division, samtang si Warren Vergara maoy nanghawod sa seniors 30 division sa oras nga 31:15. (BANATSPORTS)