Yuson hari sa Keiz BJ moto-x

CEBU, Philippines - Ang bisitang si Dondon Yuson maoy nangu sa mga mananaog sa 2010 Keiz BJ Motocross Invitational Tournament niadtong Domingo didto sa Brgy. Caduawan, Tabogon.

Napuhalan ni Yuson si Jonjon Adlawan alang sa titulo sa experts division, samtang ang laing bisita nga si Kimboy Pineda mi-okupar sa ikatulo.

Wala sab himuon magminghoy si Pineda tungod kay iya man nga gidominar ang pro-open division batok nilang Adlawan ug Yuson nga nahimutang sa ikaduha ug ikatulo.

Wala sab magpaalkanse si John Flores ug mikadlit sab kini og titulo sa novice open human niya gipilde silang Clark Wagas ug Dexter Bacabac. Hinuon si Bacabac maoy naghari sa executive A class batok sa event organizer Siegfred Ornopia ug Roman Llorente alang sa ikaduha ug ikatulong dapit.

Ang kapildihan ni Ornopia gitubos sa iyang anak nga si Kerry Keizer, kinsa maoy nanghawod sa peewee below-7 category ug sa peewee special limited edition. Ang iyang igsuon nga si Ken Kerry mipahiluna sa ikaduha sa peewee below-7 category.

Si Earl Jean Brylle Ornopia milangkat sab og korona pinaagi sa mini class 85cc. Si Brylle mitapos sa ikaduha sa mini class 65cc. nga gidominar ni JP Cuesta.

Nagubot ang mga tawo dihang ang mga bayot na ang naglumba ubos sa Bugno Sila (bayot) division diin si Sonny Girl Largosa maoy miangkon sa korona. Si John Rell 'Mystica' Lepiten maoy miangkon sa ikaduhang dapit, gisundan nilang Roy 'Roro' Lopez, Lady Bong Gopio ug Moritz Toling Jeremiah.

Lain pang naghari sa tagsa-tagsa nila ka dibisyon mao sila si Russel Gungob sa executive B, Bobong Baluyos sa executive C limited edition, Amboy Antiga sa beginners first timer, James Mayo sa local enduro, Dandan Berizo sa habal-habal, Arvin Montejo, kinsa maoy nanghawod sa wanggits ug sa habal-habal & wanggits showdown. – BANAT NEWS