CEBU, Philippines - Nagmangtas og maayo ang kanhi UV Lancer nga si Dante Elim ug Allan Cabral nga nagkumboya og 73 puntos aron timonan ang Lite Shipping ngadto sa kadaugan batok sa Aisle Marine, 118-84 sa Lucio 'Guy' Lim Sr. Memorial Cup basketball tournament diha sa City Sports Club-Cebu gym sa Cebu Business Park.
Si Elim miburak og 37 puntos, samtang si Cabral mibahog og 36 puntos matag usa alang sa 4-0 nga Lite Shipping nga nagsolo karon sa liderato uban ang 4-0 nga baraha.
Bisan og nag-aginod ang Lite Shipping sa pagsugod, apan nakamaneho gihapon kini pag-angkon og 28-22 nga bentaha paghuman sa first quarter ug dayon sila si Elim ug Cabral midoble sa ilang mga paningkamot aron inaton ang ilang labaw ngadto sa 10 puntos, 53-42 sa halftime.
Laing kanhi UV Lancer nga si Mark Anthony Manigque midugang og 15 puntos alang sa Lite Shipping. (BANATSPORTS)