Ornopia mopasiugda'g motocross sa mga bayot

CEBU, Philippines - Dili lang dinhi Sugbu, kun dili sa tibuok gyud nasud mahimugso ang labing unang motocross competition alang sa mga mahuyang kun bayot.

Kini gitawag og Bugno Sila nga usa sa mga bag-ong kategoriya nga gipuno sa ipahigayong 2010 Keiz BJ Motocross Invitational karong Oktubre 31 didto sa Caduawan, Tabogon, Cebu.

Laing duha mao ang Pewee Special Limited Edition ug ang Habal-Bahal Side B.

Buot unta ni Siegfred Ornopia nga ilakip kini sa 2010 MS Motosuit Motocross Series, apan tungod sa kakulang og panahon ug sa daghang atimanon sa iyang igsuon nga si Lou sa umaabot nga SK ug Barangay Elections, nakahukom siya nga himuon na lang kining invitational event. 

Si Lou, kinsa maoy utok sa MS Motosuit Series, modagan isip barangay captain sa Calambua sa San Remigio.

Bisan pa niini, si Siegfred mitug-an nga ang MS Motosuit mipaluyo gihapon sa maong lumba aron pagseguro nga hapsay ang dagan sa kalihukan.

Bugtong ang pro ug novice division lang ang bukas nga tigian, ang uban mga kategoriya ilakip na sa regular series sa Keiz BJ.

Gawas sa iyang pagpasiugda sa lumba, si Siegfred mosungasong na sab sa dakung gubat batok sa pambato sa Sel-J nga si Dexter Bacabac sa Executive Selection (Limited Edition). Uban ni Bacabac sa Sel-J team mao sila si Dondon Yuson, Macmac Desbaro, Noynoy Abraham, Winso Pamorca ug Ambo Yapparcon.

Lain pang makalingaw nga kategoriya ubos sa regular series sa Keiz BJ mao ang Wanggits, Habal-Habal, Wanggits & Habal-Habal Showdown, Senior Citizens ug uban pa.

Usa sab nga angay'ng atngan sa lumba mao ang senior citizen nga si Esoy Cuesta, kinsa mosaka na ngadto sa executive category.

Gawas sa mga riders sa Manila, mosalmot sab sa ikaduhang higayon ang mga banggiitang riders gikan sa Davao nga sila si Kimboy Pineda ug Burnok Mangusong ug Ted Conde sa Ozamiz City.

Masaksihan na usab ang kinamaguwang anak ni Siegfred nga si Brylle, kinsa mobalik og kabayo sa iyang motorsiklo human sa unom ka bulan nga pahulay gumikan sa injury.

Ang duha niya ka igsuon nga sila si Kenken ug Keizer mopakita sab og aksiyon sa mini ug pewee divisions.

Mopakita sab sa ilang abilidad ubos sa mini class categoryang managsuong   Peewee ug PJ Galla ubos sa pag-coach sa ilang amahan nga si Dodong Galla, ang banggiitang coach kaniadto sa Shell Yamaha Racing Team.

Matud pa ni Siegfred, nga ang maong lumba iyang ipahinungod sa tinuig nga kapistahan sa Inahan sa Kanunay'ng Panabang, ang mahal nga patron sa Caduawan karong Oktubre 30 ug ingon man sa kasaulogan sa adlaw'ng natawhan sa iyang kapikas nga si Ellen sa Nobiyembre 1. – BANAT NEWS