CEBU, Philippines – Gibana-banang mokapin sa 5,000 runners ang magginukdanay sa duha ka mga dagkung lumba sa Sugbu -- ang 5th Cebu Doctors’ University Run ug Pilipinas 25K International Marathon sayo ning buntag.
Bisan pa man sa miaging kontrobersiya tungod sa wala pagkasinabtanay sa mga organizers mahitungod sa petsa sa duha ka dagan, nadayon gihapon ang duha ka lumba nga gipaluyohan sa mga dagkung running institution nga mao ang Run for Sight Foundation ni Eye Doctor Yong Larrazabal ug sa IPI nga misulod na usab karon sa running scene.
Pinangulohan ni Kenyan running sensation Simon Losiaboi ug Sugbuanang si Madelyn Carter, 3,500 ka mga runners ang managan karon sa 5th CDU Run nga adto manukad sa CDU grounds sa north reclamation area, siyudad sa Mandaue.
Gawas sa aksiyon sa 10K division, ang maong lumba maglakip usab sa 5K ug 3K alang sa mga fun runners sama sa artista ug komedyante nga si Ruffa Mae Quinto.
Samtang didto sa Asia Town IT Park, 1,800 ka mga top local ug international runners ang mag-ilog usab sa titulo sa Pilipinas 25K International Marathon.
Si Mary Grace Delos Santos adto modagan sa PATAFA-sanctioned 25K International Marathon ug dili siya modepensa sa iyang titulo sa women’s division sa CDU Run.
May mga celebrities sab modagan sa maong lumba sama sa Sugbuanong PBB first runner-up nga si Paul Jake Castillo, kinsa modagan sa 5K run. (BANAT NEWS)