CEBU, Philippines – Usa ka dakung dungog ang naangkon ni Jhaye Rabia sa University of Cebu (UC) human mipugnit sa iyang labing unang bulawan sa 15th Milo Little Olympics-Visayas Finals kagahapon diha sa Cebu City Sports Center (CCSC).
Ang 14-anyos, si Rabia midaog og bulawan sa secondary shotput event diin mihapos kini sa gilay-on nga 8.8m ug mibuak sa iyang kaugalingong rekord sa miaging tuig nga 8.5m.
Si Rabia mipadayag nga kanunay siyang maghinamhinam sa Milo Olympics matag tuig tungod kay alang kaniya mao kini nakatabang kaniya magpalambo sa maong natad sa paugnat sa kusog.
Gawas niini, si Rabia gipaabot nga makakuha pa og dugang mga bulawan sa nahabiling mga duwa sa discuss throw ug javelin throw.
Nagsunod ni Rabia mao si Kevin Montellano sa University of the Visayas (UV)-Mandaue nga mirekord og 8.04m, gisundan ni Ricky Maravillas sa University of Southern Philippines Foundation (USPF) sa distansiya nga 7.15m.
Ang teammate ni Rabia nga sila si Joy Villahermosa ug Sarah Mae Napoles pulos sab mitunol og gold medals alang sa UC.
Si Villahermosa nag-una sa 110m hurdles nga mipatik og 16.57 segundos, samtang si Napoles nanghawod sa secondary girls high jump nga may gitas-ong 1.4m.
Wala sab magpaalkanse ang Cebu Institute of Technology (CIT) diin mikabkab sab kini og duha ka gold medals sa elementary division ug usa sa secondary level.
Si Vince Lester Cortes misakiyo og gold sa elementary boys shotput sa gilay-on nga 8.39m, samtang si Klara Sofia Graciosa mao ang nakakuha og gold sa girls elementary high jump sa iyang 1.18m.
Si Bera Saragena maoy nag-una sa girls secondary shotput sa gilay-on nga 7.54m, iyang gilupig ang pambato sa UC nga si Jelena Joy Dagatan (6.93m) ug Condy Romero sa Gothong National High School (6.72 m).
Ang ubang mga medalists mao sila si Abigail Flores sa Abellana National School sa 100m hurdles (17.26 sec.) ug Arzel Mae Palmero sa Talamban Elementary School sa girls shotput (6.49m). (BANATSPORTS)