CEBU, Philippines - Sa edad nga 37-anyos, gipamatud-an ni Juan Manuel Marquez nga anaa gihapon siya'y ikabuga aron morehistro og usa ka unanimous decision nga kadaugan batok ni Juan Diaz sa ilang rematch kagahapon didto sa Mandalay Bay Event Center sa Las Vegas, Nevada.
Sama sa una nilang sangka, pulos gipakita sa duha ka boksidor nga andam sila nga mopahigayun sa usa ka bangis nga sinukliay og kumo sugud sa away hangtud sa katapusang bagting sa kampanilya.
Unang mipakita sa iyang kahanas sa counter-punching si Marquez, apan dala ang iyang tinguha nga makabalus, milampos si Diaz sa pagpasulod sa iyang mga kinumo ngadto ni Marquez sa round five.
Nabawi ni Marquez ang momentum sa away sa round 6 ngadto sa 10 human niya makorner sa makadaghan nga higayun ang mas batan-on nga si Diaz. Lahi sa resulta sa una nilang sangka, walay nangatumba sa duha ka boksidor apan sama sa gihapon nakuha ni Marquez ang daog pinaagi sa puntosay.
Human sa dose ka hugna nga sumbagay, tulo ka mga hurado ang miiskor 116-112, 118-110, 117-111 tanan pabor ngadto ni Marquez kinsa milampos pagpanalipod sa iyang WBO/WBA lightweight title.
Si Marquez kinsa nakabawi karon human sa iyang kapildehan batok ni Floyd Mayweather Jr. misaka sa record nga 51-5-1, 37KOs, samtang si Diaz kinsa nasugamak sa ikaupat niyang kapildehan sud sa katapusan niyang unom ka sangka nahagsa ngadto sa record nga 35-4, 17KOs. (BANAT NEWS)