"Quitness" beer gipahinungod alang kang lebron james

CEBU, Philippines - Usa ka brewery didto sa Cleveland naghimo ug mipagawas pag-usab og produktong pait nga beer nga namugna human mobiya si LeBron James sa Cavaliers ug milbalhin didto sa Miami Heat.

Matod pa sa Great Lakes Brewing Co., 30 ka gallons sa pait nga beer nga ginganlan og “Quitness” na-sold out human lang sa tulo ka oras kaniadtong Miyerkules didto sa usa ka beerhouse duol sa nahisgotang brewery.

Ang maong matang sa beer ibaligya pag-usab karong adlawa apan himoon na ang first-come, first-serve basis.

Ang maong brewery nagkanayon nga ang “Quitness” usa ka gaan nga matang sa India ‘pale ale’ nga adunay pait nga mahibilin sa dila nga tukma gyud sa kahimtang sa mga sports fans sa Cleveland ning mga panahona.

Human milabay ang pito ka seasons ug wala gyud makasuway og kampiyonato si James, ang two-time nga NBA MVP mipahibalo sa miaging semana nga mobiya na siya sa Cleveland ug mokuyog kang Dwyane Wade ug Chris Bosh didto sa Miami. (BANAT NEWS)