Yosores team sulod sa semis sa Danao Inter-Color hoopla

CEBU, Philippines - Mikulit ug managlahing kadaugan ang Yosores Law Firm ug ang Vintage Talisay City atol sa semifinal game sa nagpadayong Danao City Inter-Color basketball tournament didto sa Danao Civic Center sa nahisgotang dakbayan.

Ang Yosores Law Firm pinangulohan sa ilang team owner ug manager Atty. Flor Yosores naka-ipsot batok sa host Danao Team, 65-60 samtang ang Vintage Talisay City mi-iskor ug 87-74 nga kadaugan batok sa bisitang Dumaguete Star.

Sa usa ka exhibition game, midaug sab ang Danao ruby Star Basketball Association (DARUSBA) batok sa Dumaguete Selection, 66-60.

Sila si Gideon Bughao ug Dennis Batac maoy nangu sa Yosores Law Firm pinaagi sa ilang 18 ug 16 puntos matag usa samtang si Dagol Alcontin nagmangtas alang sa Talisay pinaagi sa pagkadlit ug 24 puntos.

Ang kanhi UV star nga si Jury Violango mitampo ug 16 puntos alang sa Talisay ug si Resty Caballero miabuno ug 11 puntos samtang ang mibisitang Dumaguete Star gipangulohan ni Ferdinand Daque, ang kanhi power forward sa SWU Cobras kinsa mibahug ug 16 puntos.

Ang DARUSBA sa laing bahin, gipalig-onan sa ex-PBA star nga si Calvin Tuadles kinsa mi-iskor ug otso puntos.

Ang exhibtion game didto sa Danao gipaluyohan nilang Atty. Yosores ug Batac uban sa mga mahiligon ug basketball sa DARUSBA ug Dumaguete.  – BANAT NEWS